加加加

房屋署建議公屋加租一成，影響逾55萬公屋住戶，加租後租金超越97租金水平。
的士申請加價，市區的士起錶價加兩蚊至二十二蚊，加幅一成。

新學年私立小學、國際學校申請加價6%至10%，著名學校拔萃女小學加學費135%至五萬一千元，啟思小學加7.3%至八萬九百元，聖若瑟小學加6.1%至二萬八千元，康樂園國際學校加7.8%至九萬五千元。

學校巴士於新學年加價五成，保母車車費加三成。

新學年教科書書價加幾多？平均加幅係4%，羅祥國博士文章（五月二十二日信報）話增幅低於2011年通脹率5.1%：如果你係特首，政策局局長，睇到上面幾項加價，你會關注邊一項？如果你係立法會議員，九月參加競選，為咗爭取民望，你會關注邊一項？

官 僚政客辦事，原來唔係根據數據分析嘅，政策局之中，教育局就不問情由，同書商打硬仗，指責書商加價謀取暴利，扭曲市場，壟斷……而同一時候，學費加價多好 多噃，教育局有乜反應呀？家長會代表之流有乜反應呀？到目前為止，未見到，大概係名校大有你負擔唔到就唔好入嚟讀書之威風，而書商就好蝦到極。

家長會代表 對校巴加價五成，有冇向運輸局嘈？運輸局有冇指責營運商扭曲市場，搞壟斷？冇呀！的士申請加價一成，運輸局有冇話的士商壟斷呀？冇呀！不過公屋素來係選舉 直選票倉，民建聯、工聯會、泛民議員一定飛撲出嚟大吵大鬧，逼房署唔好加租咁多，令甚麼既定嘅「可加可減機制」情同虛設。消委會唔敢碰公屋房租，明知的士 商，校巴商硬橋硬馬唔會睬佢，學校增加學費更加理唔到，點算好呢？咪年年搵班叫做有文化嘅文人書商嚟「為民出氣」勞師動眾咁指責書價增加4%囉。講呢啲嘢 都覺得荒謬，唔怪得中大金融學教授王澤基在城市論壇公開批評：「講書價係一個無聊議題」， Much Ado About Nothing，下任教育局局長請注意及之。


左丁山
mcwriter@appledaily.com