勿歧視民建聯盛男

女人仔看 Tec：勿歧視民建聯盛男

2012年05月05日

盛女當道，高絲閒來找朋友吹水，相約當護士的朋友 Y到樓上 Cafe，她一坐下點了杯泡沫咖啡，咖啡未到，便開始訴說：「最近有人追我……」「有人追唔係好事咩？點解愁眉苦臉？點識㗎？」我問。「有次去舊同學個生 日 Party識咗，開頭都冇乜點，咪約吓食飯，傾吓電話咁囉，點知有次佢約我上佢屋企……」「唔好吊我癮啦，照講啦！」高絲按捺不住。

「佢話煮飯畀我食，我見佢間屋都幾大，應該一表人材，上到去見到佢有好多相，一睇，全部背景都係酒樓去飲嘅相，同啲名人合照，我問佢係咩人，佢話係佢啲前輩，支支吾吾咗一大輪，佢先同我講，原來佢係民建聯嘅黨員。」 Y說。

交友無分政黨背景

「民建聯黨員有乜唔好呀？同阿爺咁熟，着數都多啲啦，唔係邊有大屋住喎！」高絲安慰她，但她沒有理會：「佢一表露身份，我諗番就知出事，我好多朋友都唔鍾意民建聯，覺得佢哋有人唔做，走去做奴才，我假假哋都係盛女一名，群埋佢咪影 Cheap晒？」 Y激動地說。

「咁你嗰晚同佢點？」我問。「佢仲想點喎，我求其食完個飯就走，之後佢打來我都冇接。都怪我冇帶眼識人啦。」

朋 友感情事，高絲通常聽過就算，很少過問，但也忍不住說句：「民建聯黨員都係人，應該平等對待，如果你歧視佢，你咪同佢哋一樣，都覺得人有等級之分？」 Y默然。「當然，感情這回事，唔夾就唔夾，佢信仰民建聯，好大程度反映佢人格，覺得唔啱，就禮貌地婉拒，做個有教養盛女，唔好因為佢嘅身份而歧視佢。」

Y聽後，像想通了：「我諗係因為佢價值觀而唔鍾意佢，而唔係佢身份，下次佢打嚟，我一定接！」高絲呷了一啖鮮奶咖啡，向她會心微笑。

高絲