一葉知秋, 「火燭鬼」作風

振英及梁營所為，真係令人幾搔頭。無厘頭同《蘋果》開火，指摘佢哋報道人事委任消息影響人心，又教道該報記者應如何提問。呢種同傳媒「開拖」，由部署到手 法都係業餘兼小學雞，互窒寸嘴又豈是特首所為。

振英「開拖」手法小學雞

特首同傳媒火併要揀啱議題，仲要有計劃部署執行，因為傳媒總是佔據上風。公眾認為即使傳媒報道有誤，但出發點係監督政府權貴，因此多認為情有可原。相反權 貴應受傳媒監督，不能夠動輒向傳媒指指點點。選舉期間振英無厘頭同《星島》開火，結果搞到自己灰頭土面。今次又再犯同樣錯誤，顯示出佢根本無從《星島》事 件吸取過任何教訓。

凸顯管治作風「火燭鬼」

事後羅范急急劃清界線，表示自己並非拍板發出該新聞稿之人，傳媒認為她將責任推給公務員的新聞官，這只是大家想當然。一個新聞處 IO絕無可能草擬一份如此有性格的新聞稿，授意之人應是梁振英，由他親自下命令，要求新聞官按他意思草擬及發出，羅范或未過目可能是實情，而執筆之人只是 按本子辦事，承擔責任者就只有梁振英。

再加上《星島》前科，振英主催攻擊《蘋果》有九成可能。如果佢係有計劃，應會一步一步升溫，將矛盾擴大，但 睇落又唔多似，似個人唔順超發爛渣多啲。但呢場仗並不會就此罷休，媒體一定食住上，伺機再狠狠打多一棍，五司十四局及文化局長人選爭議會係大好機會。而 7.1未到已劍拔弩張，準備開打，阿爺見住，對振英有何好處？

今次事件再一次畀人睇到，振英管治作風係「火燭鬼」性格，加上羅范、林鄭等廖化型悍將，要勒都勒唔住，只會火上加油撥行佢。一葉知秋，未來五年香港將為此折騰不已。

添馬男