Cheap精治港

最近保皇三人組紅爆網絡，先有偷雞鼠王芬改開會時間被踢爆發晦氣，跟手元秋包租婆蔣麗芸接力，上演潑婦罵街，最近風頭比另一位錯字王Tree根蓋過。另一 邊廂政府也唔好得去邊，環保局局長星爺凡被問熱門政策問題，一律唔表態，副局長陸恭蕙落區做show，就將擴建堆填區及起焚化爐，一招大挪移卸比梁特首。 至於行會樓王林奮強涉偷步賣樓，不單止冇反省，仲寸寸貢，擺出一副睬你都儍乞人憎姿態，市民唔嬲有假。

論梁班子　大孖沙得啖笑

據悉某次大孖沙聚會，講起一班梁粉新貴，大家冷笑，認為吳克儉、黃錦星未入政府前可能200萬年薪都未到，𠵱家有成400萬年薪，梗係死都唔會走。在權 貴眼中所謂梁粉局長，連高級打工仔地位都未到，本身無所成就，難怪連葉劉都話梁班子乃有史以來最弱。至於行會亦唔好得去邊，你話以前梁智鴻、夏佳理、李業 廣、李國寶、Marvin Cheung（張建東）點會cheap到好似林奮強咁。

大家有頭有面，有地位、有尊嚴，斷唔會為賺多一兩百萬，趕在政 府打擊樓巿前出貨，因為當一個有地位嘅人，面子比錢更重要，俾傳媒吠兩聲，在自己圈子已好冇面，仲點出嚟Hong Kong Club行。比banker撞到問句：「Marvin，乜呢排好手緊咩？」屆時真係無地自容。
梁振英所埋之班底，在商界眼中係一班cheap 人，cheap者並非指出身基層，因為基層也可以好高尚、有品德，好似工聯嫻姐，同樣鬧人，砌張建宗，比蔣麗芸之元秋上身，政治修為高得多。我信鄭耀棠亦 唔會利用行會身份，聽聽埋埋政策消息幫自己投資賺錢。梁系人馬之cheap係冇自覺自重，尊重自己掌權者的身份，仍當自己係underdog。聲大夾惡， 諉過於人。

最大鑊係吳、黃、陳、林等人，俾傳媒砌完後面皮變厚，心亦可能會變黑，面厚心黑，政府還可能行之正道嗎？

添馬男