CY就一定無言論自由?

原帖由 Crystal-Clear 於 2012-3-22 05:05 PM 發表

CY就一定無言論自由?

首先問一下,現在既生活你覺得好,公平,定係點

我見社會反對聲音不斷

呢D就係9年來既政府為香港帶來的

CY再衰,衰現在100倍,我覺得同現在無分別

但佢有一點同現在政府既唔同,強硬手段 ...

梁振英講過：「凡事都諮詢民意，還算甚麼領袖」

你認為佢真係會聽市民既說話?

你再睇返佢支持23條啲言論

論政綱

狼最大俘獲民心嘅一點，係所謂「港人港地」政策，禁止外地人來港買樓。不過攞晒提名之外，狼已經迅速轉呔加設前提，話係「當市場過熱時」。市場過熱根本係各說各話，任意操作，毫無客觀標準。記得曾俊華同鄭汝樺幾年來不停話樓市冇過熱，冇泡沫，直到最近先肯復建居屋。可見所謂「港人港地」只會淪為另一個「假大空」，係一個競選騙術。加上見到佢對民意用完即棄嘅嘴臉，如同佢對羅范劃清界線嘅招數如出一轍，要政綱左搖右擺嘅人去兌現承諾或者幫港人爭取問題根本係妄想。好多無知市民對狼寄予厚望，根本係停留佢運用競選騙術時嘅形象，而且畀仇恨地產霸權情緒遮蓋理智。

論關係

有人話狼同四大家族關係唔好，所以會打擊地產霸權，根本係線性思考簡化問題。佢同四大地產商關係唔好，但佢入閘之後政綱大縮水，就係為咗向地產商買票，換言之以為佢會向四大家族郁手嘅諗法真係好天真。重有佢背後嘅財團都係一班中資地產商，羅康瑞、陳啟宗呢班人如果上到位，就會開倉派米畀香港人人人有屋住？最後狼唔係同四大家族關係唔好，而係同政界左中右，工商各界冇人關係好，因為個個都覺得佢得人驚呀！

論現實

四大家族盤根錯節，生活各方面都關佢事，就算狼真係想郁佢哋又真係會郁到？香港樓價一直為高係因為高地價政策，而土地買賣同地稅係香港政府主要財政收入。睇下老董時期樓市跌到成個政府長期財赤，要賤買政府資產搞到資本更加落入財團手中，連管治都出現危機，呢個risk狼一定唔會冒。維持樓價高水平先可以維持香港經濟，只有改革稅制開拓新產業先可以解決呢個問題。但狼有講過呢啲咩？所謂「變」全部都係小修小補嘅政策，同豬嘅政綱更加係大同小異。用家市場同炒家市場、土地增值稅佢連提都冇提，會真係解決到地產霸權？就算係清到四大家族個袋，個餅只會畀狼營地產商接贓，點會流到啲小市民手中呀？礙於現實根本狼就不能夠挑戰地產霸權。

論能力

狼能力係高過豬幾班，所以唔會受財團控制，不過問題係佢受西環控制嗰下更得人驚。打壓言論自由、新聞自由、集會自由、鷹派姿態攻擊民主派、支持23條，每一個都係威脅到香港每一口呼吸嘅空氣。就算畀你駁到我以上咁多個point，依然相信狼上位市民就有樓住，有樓不過完全被剝奪自由你又肯同魔鬼交易？有能力係好，有能力不過冇制約就畀冇能力壞一千倍，刀都有兩面，可傷人亦可傷己。重要嘅係狼係疑似共產黨黨員，即係佢要守西環意志佢執行黨務，咁香港人權法治自由民主就一定凶多吉水。

我非豬fans，更加恐懼狼。睇下以前共產黨點樣講到國民黨同四大家族幾貪腐無能，講民主自由，打土豪分田地將咁天花龍鳳，結果班農民幫手打走咗國民黨之後，以為有好日子過，點知成個國家一直衰足60年呀！